«Сәт -сапар» деп қол бұлғаймыз бәріміз, тілейміз біз армандарға жеткеніңіз!»
10 маусым күні жүректері лүпіл қаққан, қимастық пен қуаныш, аңсау мен арман сезімдері араласқан өмір жолының алғашқы қадамында тұрған Новоишим қазақ орта мектебінің жас түлектері қолдарына негізгі мектеп бітіргендері туралы аттестаттарын алды. Осындай салтанатты сәтке жету үшін түлектеріміз «Үміт» кемесінің 2017-ші рейсіне мініп, мұхит саяхатына баруға тура келді, ал оның болу ұзақтығы мектеп өмірінің 11 жұлдызды жылына сәйкес келді. Яғни әр аялдамада түлектерімізді әр–түрлі сәттер күтіп тұрды.
Кемеміз мектебінің акт залына келгенде, түлектерімізді бортқа отырғызу рәсімі билеттер арқылы өтті.
Кеш жүргізушілері жолаушыларға жүзу барысында тыйым салынған нәрселерді істеуге болмайтынын ескерткеннен кейін,
түлектер толқын әуенімен жүзуді бастады.
Ең бірінші аялдамада түлектерді тосын сый күтіп тұрды. Яғни аудан әкімі В. С. Дудов түлектерге өз атынан құттықтау хатын жіберіп, әр түлекке төсбелгіні сыйға тартты. Сыйлықтарды табыс ету рәсімі аудан білім бөлімінің басшысы С.Т. Алтаевқа берілді. Келесі аялдамада түлектер қойылған сұрақтарға жауап беріп, барлығы бір адамдай 11 жыл бойы алған білімдерін одан әрі жалғастыруға, адал және шыншыл болуға, мектебіміздің атына кір келтірмеуге ант берді.
Әдемі толқын әуенімен бара жатып түлектер ең манызды аялдамаға да жетіп қалды. Бұл аялдамада оларды үлкен өмірге аттандыратын негізгі мектеп бітіргендері туралы аттестаттар күтіп тұрды. Бұйрықты оқу құқығы Г. М. Жолдаспаеваға, тапсыру рәсімі мектеп директоры С.Т. Сүйесіноваға берілді.
Елбасымыз ерекше атап өткендей, Қазақстанның болашағы – білімді, зерделі жастардың қолында. Білімді ұрпақ қана ел дамуына даңғыл жол ашады.
Үлкен талап, зор еңбекпен білімдерінің алтын сапасын растаған, өмірдің осы аталған ең басты қағидасын терең ұғынып, әлдеқашан санаға бойтұмар еткен Иманбаева Әлия және Серікбай Динара «Алтын белгі» атағына ие болды.
Сынып жетекші Б.Н. Рамазанова өз шәкірттерін құттықтап, бала тәрбиесіне көп көңіл аударғандарын үшін өз атынан ата-аналарына үлкен алғысын білдіріп, мадақтамаларды табыс етті. Аттестат алу рәсімі аяқталғаннан кейін, барлық түлектер, ата-аналар және қонақтар естелік фотоға түсті.
Новоишим қазақ орта мектебінің
тәрбие ісі орынбасары Б.К. Амиржанова
